Мүрүтээҕи «Мичил» оҕо тэрилтэтэ 2022 сылы сэмэй ситиһиилэрдээх түмүктээн эрэбит. Тэрилтэбит бары үлэһиттэрэ, төрөппүттэрэ биир сомоҕо буолан, оҕолорбут сайдалларын туһугар айымньылаахтык үлэлиибит. Ол түмүгэр, Саха АССР 100 сыллаах өрөгөйдөөх үбүлүөйүн көрсө, Бүтүн Арассыыйатааҕы көрүү-күрэс кыайыылааҕа буолан «Арассыыйаҕа бастыҥ оҕо тэрилтэтэ – 2022» ааты ылбыппыт.

СӨ үөрэҕириитин туйгуна, туйгун категориялаах иитээччи Матрена Иванова уонна өрөспүүбүлүкэҕэ “Бастыҥ иитээччи – 2016” анал ааты ылбыт Марфа Копырина быйыл элбэх ситиһиилэрдээхтэр. Кинилэр оҕолору хоһоон ааҕыытын курдук уустук, умсугутуулаах эйгэҕэ үөрэттэллэр. Ийэ сылыгар анаммыт улууустааҕы, өрөспүүбүлүкэтээҕи ийэ туһунан хоһоону ааҕыы күрэхтэригэр оҕолорбут Артем Губарев – Гран-при, Самаана Герасимов, Кеша Горохов, Айынаара Дьячковская бастакы миэстэлэри ылан барыбытын үөртүлэр.

Олоҥхо декадатыгар аналлаах улуустааҕы куйаар ситимин нөҥүө ыытыллыбыт олоҥхону дьиэ кэргэнинэн толорууга Васильевтар: эбэлэрэ, ийэтэ уолунаан Ян Васильевтыын кыттан, II үрдэли ситиһэннэр сүргэбитин көтөхтүлэр.

Өрөспүүбүлүкэтээҕи «Чычып-чаап» диэн чыычаах оҥоһугун куонкурсугар Алгыстаана Петухова I-кы үрдэли, Ванесса Егорова «Айар-тутар сатабыллаах тарбахчааннар» анал ааты ылары ситистилэр.

Оҕолору оскуолаҕа киириигэ бэлэмниир биир сүрүн сорукпут буолар. Иитээччилэр ону таба өйдөөн, үлэлэрин ситимнээхтик тэрийэллэрин түмүгэр, оҕолорбут улуустааҕы «Умники и умницы» күрэскэ үчүгэй ситиһиилэри көрдөрдүлэр. Нуучча тылыгар – Бороҕон кыыһа Айыллыыта, ахсааҥҥа Айсена Тарская бастакы миэстэни ылары ситистилэр. Бу биһиги педагогтарбыт: үрдүк категориялаах, 2015 сылга өрөспүүбүлүкэ бастыҥ иитээччитэ – Сардаана Егорова, I категориялаах Анна Сивцева күн ахсын ыытар сыралаах, түбүктээх үлэлэрин түмүгэ буолар.

Оскуола уонна оҕо тэрилтэтэ бииргэ үлэлииллэригэр көмөлөөх, өрөспүүбүлүкэбитигэр үөрэтии хаачыстыбатын үрдэтиигэ анаан «Хакатон – 2022» аныгы дистанционнай күрэс ыытыллыбыта. Манна биһиги Г.В. Егоров аатынан Мүрүтээҕи 1 №-дээх

орто оскуола алын кылааһын учууталларын кытта биир хамаанда буолан кыттыбыппыт. «Инновация в непрерывности» анал ааты ылан, саҥа үйэҕэ эрэллээх хардыыны оҥордубут.

РФ үөрэҕириитин туйгуна, уоппуттаах педагог Людмила Дьячковская оҕолору үҥкүүгэ уһуйар. Кини үлэтин түмүгүнэн оҕолорбут сылын аайы улууспутугар, өрөспүүбүлүкэҕэ Гран-при, лауреат үрдүк аатын ылаллар. Улуус Аҕа баһылыгын Харыйатын «Крылья ангела» тэрээһинигэр оҕолорбут бэртээхэй үҥкүүнэн кытыннылар.

Бэлэмнэнии бөлөх иитиллээччитэ Эмма Черкашина улууспут Аҕа баһылыгыттан бэлэх, анал грамота тутта. «СӨ оскуолаҕа киириэн иннинээҕи саастаах оҕолору сайыннаарыыга кылаатын иһин» анал бэлиэ хаһаайына Виктор Васильев оҕо эт-хаан өттүнэн доруобай буолуутугар үгүс сыратын уурар. Кини сайыннарбыт оҕолоро билигин араас таһымнаах күрэхтэһиилэргэ бэлэмнээхтэрин көрдөрдүлэр. Ол курдук үөрэппит оҕолоро Арассыыйа чөмпүйэнээтигэр, мөлтөхтүк истэр бэйэтин саастыылаахтарын кэккэтигэр, Кирилл Охлопков греко-римскэй тустууга, өрөспүүбүлүкэтээҕи многоборьеҕа Ири Сивцева, уһук илиҥҥи тустуу аһаҕас турниргар Женя Бочкарев, өрөспүүбүлүкэтээҕи буокса күрэхтэһиитигэр, көҥүл тустууга Алекс Гоголев бастакы миэстэни ыллылар. Виктор Николаевич улууспутугар үлэни көҕүлүүр сыаллаах «Лучший специалист по охране труда» күрэскэ кыттан, иккис миэстэни ылбыта.

Бу сыл олус түбүктээх, эппиэтинэстээх буоларын бары да эппитинэн-хааммытынан биллибит. Саха сирин норуоттарын VIII-с спортивнай оонньууларыгар саҥа сэбиэдиссэйбит Алина Никифорова тула биир санаанан түмсэн, көхтөөхтүк кытынныбыт, үлэни кыайа-хото туттубут. Түгэнинэн туһанан, махтал истиҥ тылларын биһиэхэ күүс-көмө буолбут Бороҕон нэһилиэгин дьаһалтатын баһылыгар Василий Алексеевка, кини үлэһиттэригэр тиэрдэбит.

Источник: мюрюгазета.рф